Por que contará estrelas?, preguntáronse os nenos que, de madrugada, saían cazar ras verdevermellas. Unha pregunta inocente, mesmo intranscendente, acaba revolucionando todo un reino, e mesmo implicando as súas máis altas instancias, na procura dunha resposta que soamente chegará tras arduas singraduras por mares e montañas e… ata máis alá do fin do mundo! O segredo, fío condutor de boa parte da produción oral e escrita de Arturo Abad, vai estar nunha resposta, tamén en aparencia, inocente: “Porque ela tamén conta”. Teresa Lima, recoñecida artista portuguesa, achega ao texto a súa técnica mixta (pastel, lapis de cor…), de suave paleta cromática, pero amplos contidos semánticos e visuais, que acompaña un álbum de lectura pausada e reflexiva, de combustión lenta e profundos ecos.
